Глава VIII. О искуплении пленных

Глава VIII. О искуплении пленных

1. Полоняником на окуп збирати денги ежегод з городов всего Московского государства, с посадских дворов и с ямщиков и со всяких жилецких людей, которые живут в городех на посадех, и с уездных с патриарших и с митрополичих и с архиепископлих и епископлих и с монастырских вотчин, со крестьян и з бобылей з двора по осми денег. А государевых дворцовых сел, и черных волостей и с помещиковых и с вотчинниковых крестьян з двора по четыре денги, а с служилых людей, с стрелков и с казаков и с пушкарей и з затинщиков и с воротников и с казенных плотников и с кузнецов и со всяких служилых людей, з двора по две денги. А збирати те денги погодно в Посолской приказ, по новым переписным книгам, а не по сошному писму, чтобы в том денежном зборе никто в ызбылых не был, занеже таковое искупление общая милостыня нарицается, и благочестивому царю и всем православным християном за то великая мзда от бога будет, якоже рече праведный Енох, не пощадите злата и сребра брата ради, но искупите его, да от бога сторицею приимете. И пророком рече бог, не пощади сребра человека ради. Христос же, не токмо сребра, но и душю свою повелевает по братии положити. Больши бо тоя, рече, любве никто же не имать аще кто душю свою положит по братии своей. И того ради христова слова благочестивым царем и всем православным християном не токмо пленных окупати, но и душю свою за них пологати достойно, да сторичныя мзды во он день сподобятся.

2. А на окуп давати полонеником за дворян и за детей боярских, которых привозят на окуп турские и крымские послы и гречане, с их окладов, которые взяты на боех с поместных окладов, со ста четвертей по дватцати рублев.

3. А которые взяты будут в полон не на бою, и не в посылках, и тем давати на окуп со ста четвертей по пяти рублев.

4. За московских стрелцов по сороку рублев.

5. О украинных городов, за стрельцов и за казаков по двадцати по пяти рублев.

6. За посадских людей по дватцати рублев за человека.

7. За пашенных крестьян и за боярских людей по пятинатцати рублев за человека.